الثورة

كدب ف كدب و لطش ف لطش

حاكم ظالم نازل بطش

فاكر إن الشعب ده كله 

لازم يخدم من حواليه

فاكر إن الناس دى بحالها 

خدوا ع الذل خلاص ...طب ليه؟؟؟

حاكم ظالم شد ايديه

ايد الدنيا من حواليه

خلى عيونه بليل ما تنام

خلى النيل قطراته كلام

خلى الحق فى ايدنا سلاح

و الحرية طريقها كفاح

قول الحق بعزم و قوة 

خلى الدنيا تشعلل نار

قوم و اخوانك وياك قوة

خلى العزة تخش الدار

آدى الدنيا من حوالينا

كل الناس صبحت أحرار

اشمعنا احنا ف كل الدنيا

بينا و بين حكامنا ستار؟؟!

آه يا بلادى دايما خيرك

واخده جماعة حلق حوش

بيروح واحد ييجى التانى

يسرق ينهب ما نحشهوش !

يلا بقى خلينا نعود

زى زمان عرب الأمجاد

و العز اللى هجر نواحينا

يرجع تانى بكدح ايدينا

و الخوف اللى سكن أرواحنا

و عشش فينا و من حوالينا

لازم نطرده أو حنموت

قبل الوقت أوام ما يفوت

نجمع من أحرارنا خيوط

ننسج توب الحرية

و تعود مصر العربية

نجمة فى السما بتلالى

توب الحرية الغالى

تمنه  دم  بنات وولاد

و الوجعة صبحت أعياد

أعياد  مصر  الحرية

    أحمد الشيخ

6 أكتوبر 2004

تمت سطورها الأخيرة فى

21 فبراير 2011